Heldur Hellisheiðin?

Suðurlandsskjálftar hafa þann eiginleika að byrja austast í þverbrotabeltinu og færast síðan vestar.  Skjálftinn sem varð í dag er í samræmi við þetta mynstur.  En eitt vekur óneitanlega athygli þegar dreifing jarðskjálfta er skoðuð.  Það er mikið af jarðskjálftum á Hengilsvæðinu og mikið af jarðskjálftum jafnan á Reykjanesinu og við Kleifarvatn, en Hellisheiðin sjálf er yfirleitt tiltölulega róleg. 

Bergið í Hellisheiðinni er svo sterkt að það virkar sem einskonar þröskuldur og kemur í veg fyrir að skjálftaórói við Hengil tengist beint skjálftunum á Reykjanesinu.  En hvað gæti gerst ef bergið í Hellisheiðinni myndi hrökkva til?  Gæti þá orðið skjálfti t.d. á Bláfjallasvæðinu eða þar fyrir ofan?

Með skjálftanum í dag virðist þrýstingurinn aukast á Hellisheiðina og Bláfjallasvæðið.  Ég er alls ekki að segja að það verði annar stór skjálfti á næstunni, jafnvel ekki næstu áratugina.  Ég vil einungis benda á, að líkurnar á skjálfta vestan við Ölfus og á Hellisheiða- og Bláfjallasvæðinu hljóta smám saman að aukast með tímanum.  Þetta verða menn að hafa í huga þegar þeir eru að skipulegga frekari virkjanir á Hellisheiði og einnig verður að gæta að því að ef skjálftavirkni færist nær höfuðborginni þarf að gæta fyrirhyggju og undirbúa að skjálfti um 6 á Richter gæti hugsanlega orðið í Bláfjöllum eða á Hellisheiði.  

Allur er varinn góður!

 

Athugasemdir

[Steingerður Steinarsdóttir, 29.5.2008 kl. 21:26]

Athyglisvert.

[Guðjón Sigþór Jensson, 30.5.2008 kl. 00:05]

Fróðlegt væri að fá betri upplýsingar um jarðfræðigrunn Hellisheiðar. Nú hefur Orkuveitan látið Jarðboranir bora allmargar holur í tengslum við Hellisheiðarvirkjun og tilraunaborholur austar á Heiðinni. Það ætti því að vera nokkuð ljósar upplýsingar niður undir á 2000 metra dýpi eða svo eins og dýpstu borholurnar eru þarna.

Merkilegt er að nýr hver hafi myndast norðan við Garðyrkjuskólann. Spurning hvaða áhrif þessir skálftar hafa á yfirborðshita við Hveragerði.

Bestu kveðjur austur heiði. 

Mosi 

[Svava S. Steinars, 30.5.2008 kl. 00:48]

Vona að þið hafði sloppið vel frá skjálftanum!! Reyndi að bjalla í dag en náði ekki í þig.  Hafið það sem best !

[Kolbrún Baldursdóttir, 30.5.2008 kl. 17:49]

Sæl, þetta er fróðlegt, vona að þið hafið sloppið eins og vel og hægt var miða við aðstæður og innilegar samúðarkveðjar vegna andláts pabba þín.

Hver veit nema við hittumst í sumar en við verðum mikið á ferðinni þarna austur.

kv

k