Orkuveitusápan - framhald!

Fjölskyldan hefur nú komið Willy J.R. á elliheimili en dauðaleit stendur yfir að samningnum sem Willy skrifaði undir.  Miss Elly heldur því fram að hundur hjónanna hafi étið samninginn af því að hann var í megrun (og svangur).  Willy J.R. er í sjokki af því að fjármálahákarlarnir hafa allir sitt eintak af samningnum en hann hefur bara hundaskít.

Björn Ingi Cliff Barnes er búinn að bjarga pólitískum ferli sínum í bili og hefur ráðið Bill Clinton sem fjölmiðlafulltrúa og kynlífsráðgjafa.  Kosningastjórinn er kominn til Síberíu þar sem REI ætlar að fjárfesta í olíuleit við Pechora í samvinnu við rússnesku olíufurstana.  Olíuhreinsunarstöð verður reist í Viðey og mun loga þar stöðugur eldur í minningu John Lennons.  Það er búið að reikna út áhættulíkan fyrir olíuhreinsunarstöðina og ef hún springur kviknar bara í Höfða.  Grímseyjarferjan hefur hafið sætaferðir út í Viðey.

Pamela er komin í jóga hjá samtökum íslandsvinarins Sri Chimnoy og Sue Ellen sást síðast í tygjum við Ringo Starr en þau fara huldu höfði af því að glæponinn Smirnoff er afbrýðisamur og eltir þau uppi hvar sem þau eru.  Ennþá er ekki vitað hver á hitaveitu Suðurnesja.

Fylgist með í næsta þætti þegar:  J.R. Willy dregur sig endanlega út úr pólitík.  Bjarni Ármanns litar bláu augun sín græn, Sue Ellen drepur Smirnoff með kreditkorti Björns Inga og Vladimir Pútín er orðinn forstjóri Hitaveitu Suðurnesja sem heitir núna Rússkíj energíj í geotermícheskaja kompaníja.

Ófyrirséður kostnaður við aukið frjálsræði í viðskiptum

Niðurbrot tollamúra og aukið frjálsræði í viðskiptum á að gegna því hlutverki að auka framleiðni í þeim þjóðfélögum sem í hlut eiga.  Gamlar úreltar atvinnugreinar eiga að þurrkast út af borðinu ef þær standast ekki alþjóðlega samkeppni af einhverjum ástæðum.

En það er einn galli á gjöf Njarðar.  Þegar gömlu úreltu fyrirtækin fara á hausinn tapast mikill fjöldi starfa sem ekki verða til annarsstaðar.  Alveg frá því í heimskreppunni miklu hafa hagfræðingar vitað að störf verða ekki til af sjálfu sér.  Það þarf bæði framtakssemi, hugvit, menntun og fjármagn til þess að skapa ný störf. 

Kína hefur t.d. passað sig á því að taka ekki niður tollamúrana fyrr en atvinnugreinar innanlands hafa verið tilbúnar til þess að mæta fárviðri alþjóðlegrar samkeppni.  Það er því ýmiss konar dulinn kostnaður sem fylgir auknu fjálsræði í viðskiptum - kostnaður sem ekki kemur fram fyrr en eftir á.

Aukið frjálsræði í alþjóðlegum viðskiptum hefur einnig oft verið einungis á forsendum ríku þjóðanna en ekki stuðlað að aukinni hagsæld hinna fátækari.  Efnahagsleg nýlendustefna er ennþá í fullum gangi en vitað er að margir fátækari íbúar heimsins hafa fengið sig fullsadda af tvískinnungi hinna ríku og efnameiri íbúa heimsins.  Þetta getur leitt til ólgu og átaka sem aftur eru kostnaðarsöm bæði í efnhagslegu og félagslegu tilliti.  Niðurstaðan er sú að það er betra að framkvæma breytingar hægt og rólega, af yfirvegun með tilliti til aðstæðna, en ekki með offorsi og látum.

 

Að reikna sig út í horn (með reiknilíkani Landsvirkjunar)

Nú liggur loksins fyrir áhættumat vegna Þjórsárvirkjana.  Í áhættumatinu er m.a. notað HEC reiknilíkan sem nota má til að reikna út flóð í vatnsföllum bæði með og án mannvirkja.  Eins og alltaf þegar slík líkön eru sett upp skiptir öllu máli HVAÐ ER SETT INN Í LÍKANIÐ Þ.E. FORSENDURNAR SEM GENGIÐ ER ÚT FRÁ. 

LÍKÖN ERU EINFÖLD:  UPPLÝSINGAR INN -> KEYRSLA Á LÍKANI ->UPPLÝSINGAR ÚT

Verkfræðingar eru frægir fyrir að setja allt mögulegt inn í reiknilíkön og keyra út niðurstöður.  Þeir setja sennilega ástina sína einnig inn í reiknilíkan og fegurðina við sumarbústaðinn sinn og jafnvel dauðann sjálfan og reikna síðan út líkurnar. 

Áhættumatið vegna Þjórsárvirkjana er ekkert annað en eitt stórt reiknilíkan hugsað af verkfræðingum Landsvirkjunar og eins og gildir um öll slík reiknilíkön kemur jafn mikið af bulli út úr líkaninu eins og magn bulls sem er sett inn í það í upphafi.  Jafnan lítur þá svona út:

BULL INN -> KEYRSLA Á LÍKANI -> BULL ÚT.

Ég er mjög spennt að sjá hvernig verkfræðingar Landsvirkjunar hafa sett jarðfræði svæðisins inn í líkan með sprungum á 1km bilum, flekaskilum, landreki, jarðhita, megineldstöðvum, jökulbergi, setlögum, tíðum jarðskjálftum og þar fram eftir götunum.  Þeir hljóta að nota hröðustu ofurtölvur sem til eru í heiminum því annars er ekki hægt að reikna alla þessa parametra saman auk þess sem þeir hljóta að fá nóbelsverðlaunin fyrir þetta líkan takist þeim að koma því heim og saman og fá einhverja vitræna niðurstöðu. 

Auk þess þorir enginn sem skrifar áhættumat fyrir Landsvirkjun hér á landi að segja Landsvirkjunarmönnum sannleikann þ.e. að ÞAÐ ER EKKI HÆGT AÐ VIRKJA MEÐ GÓÐU MÓTI Í NEÐRI HLUTA ÞJÓRSÁR.  ÞAÐ ER EINFALDLEGA EKKI ÁHÆTTUNNAR VIRÐI!  ÞAR AF LEIÐANDI EF ÁHÆTTUMATIÐ HEFÐI VERIÐ UNNIÐ AF ÓHÁÐUM ERLENDUM AÐILA ÞÁ HEFÐI SÁ AÐILI KOMIST AÐ ÞEIRRI NIÐURSTÖÐU AÐ ÞAÐ BORGAÐI SIG AÐ HÆTTA VIÐ ALLAR FRAMKVÆMDIR.  ÁHÆTTAN ER SVO MIKIL AÐ HÚN RÚMAST EINFALDLEGA EKKI INNAN LÍKANSINS.

Að skapa sitt eigið starf utan Reykjavíkur!

Þegar ég flutti til Selfoss var ég ekki með neitt fast starf í hendi.  Þannig að ég einfaldlega settist niður, hugsaði og bjó til mitt eigið starf.  Ég byrjaði á því að stofna mitt eigið fyrirtæki sem er bara Ingibjörg Elsa Björnsdóttir og síðan gerði ég samning við þýðingarstofu og um leið var ég orðin sjálfstæður þýðandi.  Síðan hef ég haft alveg feykinóg að gera, borga mína skatta og skyldur til skattstjórans á Hellu og ég er komin með bókhaldið til hennar Maddý sem heldur utan um það föstum höndum.  Þannig hefur mér tekist að skapa nýtt starf á Suðurlandi, starf sem ekki var áður til staðar.

Þessi árangur byggist að sjálfsögðu á menntun, menntun og aftur menntun.  Ef ég hefði ekki tekið námskeið í þýðingarfræði í Háskólanum, verið með B.A. próf í  tungumálum og B.Sc. próf í jarðfræði hefði þetta örugglega ekki tekist.  Ég hef reyndar einnig verið að kenna sem stundakennari í Fjölbraut á Suðurlandi aðallega til þess að komast út og hitta fólk.  Það er mjög gaman að blanda kennslu saman við þýðingarnar, en ég sé samt fram á að þýðingar verði mitt aðalstarf í framtíðinni. 

Ég styð þessvegna þær hugmyndir að setja upp fleiri háskólasetur t.d. hér á Suðurlandi vegna þess að í tengslum við slíkar stofnanir og Akademíur getur ýmiss konar starfsemi og fræðaiðkun orðið til.  Það er því mikilvægt að vinna áfram að því að fjölga menntakjörnum á landsbyggðinni.

Hvar eru jarðfræðingarnir?

Bankamenn og bissnessmenn telja sig geta grætt heil ósköp á jarðhitaþekkingu Íslendinga.  Það er mikið rætt um mannauð orkufyrirtækja en það er greinilega ekki í mannauði bissnessmannanna sjálfra sem hagnaðarvonin liggur.  En hverjir eru sérfræðingar í jarðhita???, nú jarðfræðingar og jarðverkfræðingar auðvitað en það er mikill skortur bæði á jarðfræðingum og jarðverkfræðingum á Íslandi í dag.  Á meðan hundruðir stúdenta fara í bissnesstengt og MBA nám, útskrifast kannski 4-8 jarðfræðingar á hverju ári.  Það er reyndar líka vegna þess að jarðfræðinámið felur í sér stíft nám í bæði efnafræði og eðlisfræði sem alltof margir stúdentar ráða ekki við.

Og íslenskir jarðfræðingar eru líka að verða gamlir.  Margir reynslumestu jarðfræðingar landsins eru farnir að nálgast eftirlaunaaldurinn.  Og þá vaknar spurningin?  Ef engir jarðfræðingar eru til staðar?  Ef jarðverkfræðingarnir eru líka af skornum skammti - á hverju á þessi mikla jarðfræðiútrás Íslendinga eiginlega að byggjast?  Á hún að byggjast á örfáum karlmönnum sem vinna botnlausa yfirvinnu þangað til þeir brenna út eða hrynja niður einhvern daginn?  

Mér finnst að þessir ágætu bissness- og bankamenn ættu að reyna að græða á sínu eigin hugviti áður en þeir fara að græða á hugviti annarra, einkum ef hugvit annarra er þegar bundið í öðrum verkefnum eða hreinlega ekki fyrir hendi.  Hafði Marx gamli kannski rétt fyrir sér þegar hann talaði um ræningjana sem geta ekkert sjálfir en lifa endalaust á hugviti annarra.

Til hamingju JCI Reykjavík!

Hinn frábæri félagsskapur Junior Chamber International Reykjavík er 40 ára um þessar mundir.  Af því tilefni var efnt til glæsilegs afmælisfagnaðar.  Að sjálfsögðu voru haldnar frábærar ræður,  og eins og alltaf í JC er maður manns gaman.  Ég var svo heppin að vera í JC Reykjavík í nokkur ár.  Þar lærði ég m.a. framkomu, ræðumennsku, fundarstjórn og fundarritun.  Ég get varla lýst því hversu vel þessi þjálfun hefur nýst mér í öðrum félagsstörfum síðar meir t.d. hjá Rauða Krossinum og í stjórn Landverndar.  Eftir að hafa verið fundarritari á Landsþingi JC Ísland í Keflavík hefur mér aldrei fundist neitt mál að snara fram fundargerðum, stórum eða smáum við ýmis tækifæri öðrum yfirleitt til mikillar ánægju.  Að sama skapi hefur þjálfun í ræðumennsku hjálpað mér að koma fram og einnig styrkt mig í framkomu í fjölmiðlum.  Að lokum má nefna að góð kunnátta í fundarstjórn er gulls ígildi, einkum á aðalfundum félaga og á húsfundum.  Ég vil því nota tækifærið og óska JCI Reykjavík til hamingju með 40 ára afmælið og þakka fyrir þau skemmtilegu ár og þá góðu þjálfun sem vera mín í Junior Chamber færði mér.  Takk fyrir mig!

Orkuveitusápan - Er fjölskyldufaðirinn Willy J.R. kominn með alzheimer

Hin æsispennandi sápuópera, Einkavæðing orkuveitunnar heldur áfram.  Fjölskyldufaðirinn Willy J.R. man ekki lengur hvað hann skrifaði undir, en allt í kringum hann bíða fjármálahákarlarnir sem þegar hefur verið boðinn forkaupsréttur.  Miss Elly hefur áhyggjur af því að Willy J.R. sé kominn með alzheimer og Bobby ætlar að leita að heilaskurðlækni. 

Á meðan er hinn lævísi Björn Ingi Cliff Barnes búinn að ræna hluta fjölskylduauðsins og koma honum til kosningastjóra síns sem hefur grunsamleg sambönd við litháísku mafíuna og olíufursta í Rússlandi.  Enginn veit lengur hver á hitaveitu Suðurnesja og Pamela er á barmi taugaáfalls.  Sue Ellen er horfin.

Inn á sviðið þýtur umboðsmaður alþingis og ætlar að fara að rannsaka fjármál Southfork fjölskyldunnar með leyfi frá ríkisskattstjóra.  Björn Ingi Cliff Barnes og kosningastjóri hans hafa samband við félaga sína Smirnoff og Rúbljov í litháínsku - rússnesku mafíunni í því augnamiði að ryðja andstæðingunum úr vegi.

En spurningin er:  Er Willy J.R. kominn með alzheimer ?  Ef svo er mun fjölskyldan koma honum á elliheimili?  Hvað verður um Pamelu?  Er glæpóninn Smirnoff í tygjum við Sue Ellen?  Hvað varð um gimsteina rússnesku keisarafjölskyldunnar?  Eru þeir orðnir hluti af Hitaveitu Suðurnesja og hefur Vladimir Pútín þá forkaupsrétt?

 

Bláu augun hans Bjarna

Ég man eftir Bjarna Ármannssyni sem ungum óánægðum kennara í Valhúsaskóla á Seltjarnarnesi.  Hann gekk um gangana með óánægjusvip og lét hvern sem vildi vita að HANN ætlaði ekki að festast í farinu sem kennari.  Skömmu síðar frétti ég af honum sem verandi í Háskóla Íslands og vinnandi að atvinnumálum stúdenta.  En sennilega hefur hann unnið mest í sínum eigin atvinnumálum vegna þess að allt í einu hafði hann tekið frábært próf frá erlendum háskóla og var orðinn bankastjóri.

Enginn á Íslandi var eins hissa eins og ég.  Það hafa margir íslendingar tekið hæstu próf frá erlendum háskólum, sennilega fleiri en almennt vitað er um, en ekki hafa allir þessir gáfumenn og konur (við skulum ekki gleyma þeim) verið gerð að bankastjórum.  En Bjarni var semsagt heppinn - hann vann í happadrætti lífsins og þarf þess vegna ekki framar að vinna sem kennari og fá útborgað 110 þús. kr. á mánuði fyrir 75% starf.  Eins gott miðað við hvað hann hafði lítinn áhuga á kennarastarfinu.  En Bjarni og hans líkar sem hafa fengið bankastjórastóla og auðlindir þjóðarinnar afhentar á silfurfati ættu að muna að það er ennþá til fólk í þessu þjóðfélagi sem vinnur fulla vinnu t.d. við umönnun sjúkra og aldraðra en fær útborgað samt einungis um 100 þús. kr. á mánuði.  Þessir menn ættu að átta sig á því að þeir eiga engan forkaupsrétt á auðlindum landsins SEM VIÐ ÆTTUM AÐ EIGA ÖLL SAMEIGINLEGA.  Þeir hafa einfaldlega ekki unnið fyrir því.

Verðlagning á fyrirtækinu mér

Þar sem ég er búin að uppgötva að menn verðleggja sjálfir sín eigin fyrirtæki og setja síðan á hlutabréfamarkað hef ég ákveðið að verðleggja fyrirtækið Ingibjörg Elsa Björnsdóttir sem er náttúrulega bara ég, undirrituð og allar mínar persónulegu mannauðlindir.  Mér reiknast svo til eftir að vera búin að meta alla mína miklu hæfileika og menntun að ég sem fyrirtæki nái upp í þetta 63 - 65 milljarða sem er aðeins meira en Landsvirkjun.  Mannauður minn er þar náttúrulega mestur en einnig hef ég stórt heilabú sem flokkast undir náttúruauðlind sem e.t.v. er að einhverju leyti vannýtt!  Með því að virkja sjálfa mig ætti ég semsagt að geta grætt um 150 milljarða eða svo þannig að bráðum verður fyrirtækið ég eða Ingibjörg Elsa Björnsdóttir sett á hlutabréfamarkað.  Að sjálfsögðu er ég í bullandi útrás, enda sífellt að blogga og skrifa í blöðin, og bráðum mun ég opna útibú í Kína og á Indlandi.  Er ekki einhver sem vill gerast kjölfestufjárfestir?

Frábær ljóðaupplestur hjá Matthíasi

Sunnlenska Bókakaffið hélt upp á eins árs afmæli sitt í dag, mér til mikillar ánægju.  Í tilefni dagsins las Matthías Johannessen upp ljóð og voru þau hvert öðru betra.  Einkum hafði ég gaman af kvæðinu um gula köttinn en mörg önnur ljóða Matthíasar voru afbragðsgóð. 

Ég var líka afskaplega ánægð að kaupa gamalt eintak af Bernskunni og Geislum, bækur sem ekki sjást oft nú til dags en mætti gjarnan endurútgefa.  Einkum fannst mér Bernskan skemmtileg og lifandi auk þess sem þessar bækur eru skrifaðar á svo góðri íslensku.

Ég vil þakka fyrir frábæra stund í Sunnlenska bókakaffinu og þakka Bjarna og Elínu fyrir að hafa skipulagt þessa skemmtilegu uppákomu.  Ég hlakka til að heimsækja Sunnlenska bókakaffið í framtíðinni og hvet alla til að gera slíkt hið sama.