Um aðalritarann Brézhnév og hugsjónamanninn Nelson Mandela

Nú var það svo að eftir að Brézhnév, aðalritari sovéska kommúnistaflokksins, var orðinn aldinn og utan við sig þá var valdaklíkan í kringum hann hrædd um að missa völdin.  Þessvegna dressuðu þeir Leonid Brézhnév upp í sitt fínasta púss, leiddu hann fram á Kremlarmúra og sýndu hann lýðnum til þess að ekki færi nú á milli mála hver stjórnaði hinum víðfeðmu Sovétríkjum.  En Brézhnév sjálfur var löngu hættur að þekkja það fólk sem hann var látinn heilsa.  Hann var algjörlega utan við sig.  Samt sem áður tókst valdaklíkunni að halda í völdin þangað til leiðtoginn dó.   Þá spiluðu þeir jarðarfararmarsinn eftir Chopin og börðust eins og hundar og kettir um að ná aftur völdum.  Chernenko varð hlutskarpastur en hann var líka hundgamall og veikur og entist ekki nema í nokkra mánuði.  Þá kom þungaviktarmaðurinn Júrí Andropov, og hefði örugglega haldið Sovétríkjunum á floti nokkra áratugi í viðbót, ef hann hefði ekki einnig orðið jarðarfararmarsinum að bráð stuttu síðar.  Þegar þessi gamalmenni voru öll úr sögunni, var loksins kominn tími fyrir hinn raunverulega leiðtoga.  Sá leiðtogi hét Michail Gorbachev og hann átti eftir að breyta gangi sögunnar.

Það sem skortir í íslenskum stjórnmálum í dag eru raunverulegir leiðtogar.  Hvar er Nelson Mandela Íslands?  Hvar er Martin Luther King jr. ?  Einu leiðtogarnir sem ég þekki í íslenskum stjórnmálum sem hafa raunverulegan eldmóð og hugsjónir eru þingmenn og borgarfulltrúar VG.  Ég treysti á ykkur! 

 

Borgarsápan heldur áfram

Nú tókst JR Villa að brjótast út af elliheimilinu fyrir útbrunna stjórnmálamenn þar sem fjölskyldan var búin að koma honum fyrir í veikri von um að hann yrði til friðs.  Og ekki nóg með það, honum hefur tekist að koma höndum yfir fjölskylduauðinn á nýjan leik. Bobby Ewing er alveg í sjokki og Pamela hefur tekið upp ástarsamband við mafíuforingjann Tony Soprano til að fá vernd gegn Villa JR.   Ásta Þorleifsdóttir er orðin aðstoðarborgarstjóri og mun stjórna fundum í borgarráði í fjarveru nýs borgarstjóra sem er á leiðinni á hressingarhæli á Hawaii.  Þetta verður til þess að fundir borgarráðs verða bæði óvæntir og glaðlegir en lengjast einnig um nokkrar vikur hver fundur.

Aldrei hefur verið eins gaman í borgarstjórn.  Aldrei jafn mikið pælt og spekúlerað. Aldrei jafn háfleygar umræður.  Framsóknarmenn verða auðþekktir af því að þeir ganga um í lörfum af því að þeir fá ekki lengur fatapeninga og  borgin riðar til falls eins og skipið Títanic eftir að það rakst á ísjakann.  Meira að segja Hilmari í stjórnarráðinu er ekki skemmt þótt hann verði að standa með sínum mönnum, a.m.k. svona opinberlega. 

 

Ruslatunnuvetur

Nú eru ruslatunnurnar foknar eina ferðina enn.  Þær hafa verið ansi mikið á ferðinni í vetur.  Þetta hefur verið sannkallaður ruslatunnuvetur.  Ég held að í vor verðum við að fjárfesta í skýli fyrir ruslatunnurnar sem vonandi getur haldið þeim á sama stað. Eða þá að við verðum að setja akkeri á ruslatunnurnar.

Á eftir ætla ég að klæða mig upp,  og endasendast út í þetta óskapaveður.  Til þess að labba upp í skóla og fá mér kaffi.  Annars er allt brjálað að gera og enginn samdráttur á þenslunni hjá mér þótt margir kvarti í fiskiðnaði og sumir segi að kreppa sé skollin á í Bandaríkjunum. 

Ég er nú svo heppin að eiga ekki mikla peninga í hlutabréfum, þannig að ég hef ekki verið að tapa neinu undanfarna mánuði.   Þeir sem eiga mikla peninga eru alltaf dauðhræddir um að missa þá.  Þeir eru eins og Jóakim frændi, sem aldrei mátti sjá á eftir einum aur til Andrésar Andar sem aldrei átti neinn aur.

Annars þá er ég alveg búin að missa áhuga á Andrésblöðum.  Las þau sennilega í 15 ár, en fékk svo bara nóg einn daginn og nennti ekki meiru.  Mikið er ég fegin að maður þroskast eitthvað smávegis í þessu lífi.  Ekki að Andrésblöðin séu endilega slæmar bókmenntir en eins og finnsku sérfræðingarnir bentu á, þá er fjölskyldumynstrið í Andrésblöðunum frekar furðulegt.   

Betra líf án gervisykurs

Jæja, nú hef ég ekki drukkið gos eða borðað gervisykur í um 5 daga og mér líður strax miklu betur.  Maginn er miklu betri og líkamleg líðan almennt mun betri.  Mér finnst ég hafa yngst um 10 ár.

Síðan er svo mikill snjór á Selfossi þessa dagana, að maður verður að hreyfa sig, ganga og hoppa yfir skaflana, sem er mjög hollt.

Hvet sem flesta til að hreyfa sig og sleppa gervisykrinum. 

Gervisykur og ofnæmi

Held að ég sé komin með ofnæmi fyrir gervisykri.  Var að lesa á síðunni mayoclinic.com að slíkt er til.  Hætti að drekka gos með gervisykri fyrir 2 dögum og er búin að vera með nánast stanslaust mígreni síðan.  EN ...maginn er miklu betri, og líðanin betri fyrir utan mígrenið sem er smám saman að hverfa. 

Nú drekk ég bara eplasafa og ávaxtasafa ýmiss konar auk einstaka kaffibolla, en gos og allt jukkið með gervisykrinum er semsagt úti.  Mig grunar að það sé hægt að fá allt of mikinn gervisykur inn í kerfi líkamans þótt ég hafi að sjálfsögðu engar vísindalegar sannanir fyrir afleiðingunum.  Læt vita eftir 2 vikur hvort að  líkamlegt ásigkomulag verður ekki orðið miklu betra.

Annars er markmið ársins að koma líkamanum í gott form.  Ég var í gönguferð áðan í snjónum og nú gildir bara að fara út og hreyfa sig hvernig sem viðrar.  Einnig búin að fjárfesta í matreiðslubókum með uppskriftum sem eru samþykktar af Lýðheilsustöð.  Hljómar kannski ekki mjög spennandi en hver sagði að grænmeti gæti ekki verið spennandi t.d. með osti eða steikt á pönnu mmmmmm.

Einnig hef ég lesið bókina um Leyndarmálið og er skv. því að reyna að hugsa jákvætt um líkamann.  Ég held að það sé mikilvægt að hugsa jákvætt um líkama sinn og hafa jákvæða afstöðu til hans eins og hann er hverju sinni.  Þessi jákvæða líkamsvitund leiðir síðan til þess að það verður gaman að fara í gönguferðir, reyna dáldið á sig án þess að fara út í einhverjar öfgar.  En batnandi og jákvæðri konu er best að lifa....vonandi???

 

Allt á fullu

Nú er allt á fullu hjá fyrirtækinu Ingibjörg Elsa Björnsdóttir sem er reyndar bara ég undirrituð.  Furðulegt að aldrei hefur verið jafn mikið að gera og eftir að ég flutti út á land.  Kóræfing í kvöld og fleira skemmtilegt á dagskránni.

Lífið er sem betur fer skemmtilegt en ekki alltaf bara stormur og rigning.   Hins vegar hef ég varla tíma til að blogga þannig að ég bið bara að heilsa ykkur öllum.

Minni á að alltaf er gaman að fá fólk í kaffi (einkum á sunnudögum).

Með kærri kveðju,

Ingibjörg Elsa Björnsdóttir

Um meint sjálfstæði dómstólanna

Nú virðist ráðherra eitthvað hafa misskilið þrískiptingu ríkisvaldsins og þetta með að ekki megi hrófla við sjálfstæði dómstólanna.  Virðist sem ráðherrann hafi með sínum pólitísku gleraugum lesið þetta þannig að um væri að ræða að ekki mætti hrófla við SJÁLFSTÆÐIS-FLOKK dómstólanna. Það eigi semsagt að tryggja að dómarar séu "réttu megin" í pólitík hvaða nafni sem þeir annars nefnast.

En málið lyktar einnig af reddingum.  Reddingum föður sem er að reyna að koma syni sínum í öruggt skjól.  Herra Davíð Oddsson hlýtur að hafa haft talsverðar áhyggjur af syni sínum, og hugsað sem svo að hann þyrfti að komast í "ÖRUGGT EMBÆTTI".  Á þessum síðustu frjálshyggjutímum fækkar alltaf öruggu embættunum,  og því úr vöndu að ráða fyrir foreldra sem vilja ekki þurfa að sitja upp með börnin fram á grafarbakkann.

En mikið er ég fegin að VIÐ ÖLLSÖMUL þurfum ekki að hafa meiri áhyggjur af Þorsteini Davíðssyni.  Nú verður drengurinn vonandi til friðs og situr á friðar-dóm-stóli fyrir norðan.  Það er eiginlega þungu fargi af mér létt???

Eitraðir málmar í flugeldum

Flugeldar innihalda ýmsa eitraða og misholla málma eins og Barium, Strontium, kopar og jafnvel kóbalt.  Meira að segja kopar er málmur sem er nauðsynlegur lífverum í mjög litlu magni, en eitraður fari hann yfir ákv. mörk.  Erlendis hafa menn verið í vandræðum með koparþök þar sem kopar hefur losnað af þökum í rigningu og runnið út í ár og vötn og valdið dauða lífvera.

Eituráhrif málma eru hrein efnafræði og hafa ekkert með skoðanir manna á flugeldum að gera.  Það er hins vegar athyglisvert að ekki skuli vera rætt meira um eituráhrif flugelda, og þau eiturefni sem þeir skilja eftir sig í borgum og bæjum.  Í flugeldum getur einnig verið kvikasilfur.

Nú koma flestir flugeldanna frá Kína, og ekki eru þar miklar mengunarvarnareglugerðir eins og hér.  Ef eitthvað á eftir að draga úr efnahagsþróun í Kína, þá er það vegna mengunar en fólk deyr þar vegna loftmengunar.  Í París er talið að um 700 manns fái krabbamein ár hvert vegna umferðarmengunar þannig að eitthvað svipað eða meira hlýtur að gerast í Beijing.  Auk þess eiga Kínverjar ekkert jarðnæði eða landrými heima hjá sér, sem er reyndar alvarlegt mál.

Er ekki annars kominn tími til þess að taka þessi flugeldamál til gagngerrar endurskoðunar? Ég krefst þess í nafni frelsisins að ég fái frelsi til þess að þurfa EKKI að anda að mér flugeldareyk.  Aðrir mega anda að sér þeirri ólyfjan sem þeir vilja.

Byssurnar í Sarajevo og fýrverkeríið

Einu sinni þekkti ég konu sem hafði upplifað borgarastríðið í Sarajevo.  Hún hafði ekki fagra sögu að segja.  Núna líður mér hins vegar eins og stríð geisi á Selfossi.  Sprengingarnar eru meiri en á Gamlárskvöld vegna þess að nú eru menn í desperasjón að reyna að klára fýrverkeríið fyrir miðnætti. 

Það verður einhvern veginn að réttlæta alla vitleysuna og brenna öllum hundrað þúsund köllunum og mig grunar að flestir segist gera þetta "Fyrir börnin eða barnabörnin."  Ef það kæmi alvöru stríð á Íslandi og verið væri að skjóta sprengikúlum eins og í Líbanon, þá er ég hrædd um að gamanið myndi kárna og flestum fyndust sprengingarnar óþægilegar. 

Nú bíð ég bara eftir því að einhver æstur flugeldaaðdáandi springi hreinlega í loft upp fyrir misgáning.  Ekkert verði eftir nema hatturinn hans eins og gerðist í bókinni "Den forsvundne fuldmægtig." (úr dönskukennslunni sælla minninga).

Ég sagði við köttinn minn að ef kettir réðu Jörðinni þá myndu þeir aldrei leggja stund á þvílíka vitleysu eins og þetta fýrverkerí.  Kötturinn mjálmaði og var mér alveg sammála.  Ef kettir réðu Jörðinni þá myndu allir fá nægan svefn og borða lifur og rækjur eins og þá lystir.   En þegar risaeðlurnar dóu út fyrir um 65 milljónum ára þurfti endilega spendýr eitt að  þróast áfram sem endaði síðan í hinum "mikla" Homo sapiens sapiensis sem er á hraðri leið með að mála sig út í horn í þróunarlegu tilliti.  Hvaða skepna verður næsti "konungur" Jarðarinnar?  

Gæludýr lengja lífið

Fyrir nokkrum árum sýndu niðurstöður rannsókna að gæludýraeigendur hafa lægri blóðþrýsting og lifa almennt lengur en aðrir menn.  Í tilviki hundaeigenda er nærtækasta skýringin hin daglega gönguferð sem hundarnir fara með eigendur sína í, en kattaeigendur hljóta að verða svona afslappaðir af því að horfa á kettina sína sofa. 

Hvað ketti varðar, þá lækkar Vampy örugglega blóðþrýstinginn hjá mér.  Hann biður mig um að slappa af með sér í a.m.k. hálftíma á dag.  Óskar nærveru minnar og sofnar í fanginu á mér.  Það er fátt eins afslappandi og sofandi mjúkur köttur í kjöltunni.

Hundar skapa mikla hreyfingu í kringum sig og það er meinhollt að fara alltaf í gönguferð hvernig sem viðrar.  Hundunum er alveg sama hvort að það er rigning eða snjór, út skal fara þ.e. ef hundi er út sigandi.   Ég veit um lækni sem sagði við eldri konu að ef hún væri ekki svona dugleg að fara út með hundinn þá væri hún öruggleg komin á hjúkrunarheimili.  Þannig hugsa hundarnir vel um eigendur sína ekki síður en eigendurnir um hundinn.

Að lokum langar mig að minnast kvæðis Jóns Helgasonar, skálds (Á afmæli kattarins):

"Mjúkur, með kirfileg kampahár

kemurðu að dyrum í morgunsár

upp þig úr munnvatni allan þværð,

augunum lygnir í sæld og værð.

Ólundin margsinnis úr mér rauk

er ég um kverk þér og vanga strauk,

ekki er mér kunnugt um annað tal,

álíka sefandi og kattarmal. "