Annríki eða andríki?

Það er allavegana mikið annríki hjá mér þessa dagana.  Hvort að það er líka andríki skal ósagt látið.  Verð að fresta öllu bloggi um sinn.  Bið bara að heilsa á meðan!

Friður á páskum - hugvekja

Þrátt fyrir allar þær deilur sem verið hafa um virkjanir og álver hér á landi, trúi ég því að allir Íslendingar elski í raun landið sitt og beri sterkar taugar til landsins.  Jafnvel þeir sem unnið hafa við framkvæmdir tengdar virkjunum, hugsa oft um landið og vilja reyna að valda sem minnstu tjóni.

Þar með er ekki sagt að allir séu sammála.  Mikið ósamkomulag ríkir um það, hvort framkvæma skuli yfirleitt og því skiptast menn, fjölskyldur og vinir í tvo mismunandi hópa.  En öll erum við Íslendingar og öllum þykir okkur í grundvallaratriðum vænt hvort um annað.  Það væri því kannski ráð núna á páskum, þegar náttúran vaknar til lífsins að minnast þeirrar náttúru sem farið hefur forgörðum með hljóðri bæn eða með því að kveikja á kerti.

Við skulum ekki ásaka aðra sem hafa aðrar skoðanir en við sjálf.  Við skulum reyna að finna þolinmæði gagnvart þeim sem eru á öndverðum meiði og reyna frekar að opna umræðuna og ræða opinskátt um málin.  Það er ekki endilega víst að þeir menn og þær konur sem starfa að virkjunarframkvæmdum vilji endilega eyðileggja landið sitt.  Við skulum passa okkur á því að gera fólki ekki upp skoðanir sem það hefur ekki.  Við skulum standa fast á okkar meiningu, en vera samt tilbúin til að rökræða og útskýra af hverju okkur finnst að það eigi ekki að byggja fleiri stórvirkjanir og álver á Íslandi, a.m.k. í bili.   

Úr því að Suður-Afríkumenn gátu unnið sig út úr hremmingum aðskilnaðarstefnunnar hljótum við hér á Íslandi að geta unnið okkur út úr þessari nauðungar landeyðingarstefnu.  Við skulum því halda frið á páskum og minnast þess lífríkis, þeirra svæða sem horfin eru og aldrei munu koma til baka.  Við skulum biðja um handleiðslu þannig að allir geti smám saman fundið leið til fyrirgefningar innan í sjálfum sér, bæði þeir sem eru hafa verið fylgjandi framkvæmdum og þeir sem hafa verið á móti.  En auðvitað verður að hætta við frekari álversframkvæmdir í Helguvík og á Bakka eigi að nást sátt um frið því sátt getur aldrei verið aðeins á annan veginn þ.e. ekki er endalaust hægt að ganga á rétt þeirra sem verið hafa á móti framkvæmdum og ætlast til þess að þeir fyrirgefi án þess að hinir, þ.e. framkvæmdasinnar leggi fram sinn skerf á móti. 

Með þessum orðum óska ég ykkur öllum Gleðilegra páska.

Alexander Púshkin

Alexander Púshkin er nokkurs konar Shakespeare Rússlands.  Hann var ljóðskáld sem skrifaði fyrstu rússnesku skáldsöguna í bundnu máli, Evgenij Onegin.  Einnig skrifaði hann kvæðið fræga um Bronsriddarann sem lýsir Pétri mikla.  Púshkin er þjóðskáld Rússa, en hann hefur ekki verið eins þekktur á Vesturlöndum og í Bandaríkjunum og landar hans Tolstoj og Dostojevskij. 

Ein ástæðan er sú að það er mjög erfitt að þýða Púshkin svo vel sé.   Sum ljóð hans eru með hrynjandi sem kallast jambískur tetrameter.  En það er samt hægt að þýða Púshkin á sama hátt og mögulegt er að þýða nánast hvað sem er.  Helgi Hálfdánarson sýndi fram á að hægt er að þýða Shakespeare yfir á íslensku og því ætti að vera a.m.k. mögulegt að þýða Púshkin líka yfir á íslensku, ensku eða önnur tungumál veraldarinnar.

En það er furðuleg þessi þögn sem ríkir um Púshkin.  Á meðan Dostojevskij og Tolstoj eru þýddir mörgum sinnum, er enginn sem leggur til atlögu við Púshkin.  Samt er Púshkin faðir rússneskra bókmennta, eins konar Jónas Hallgrímsson rússneskrar tungu.

Það getur verið að ég prófi að spreyta mig á Bronsriddaranum.  Ég þarf a.m.k. að æfa mig í rússneskunni. 

 

Er Grænlandsísinn að fara?

Óhugnanlegar eru þær fréttir sem berast með reglulegu millibili um að Grænlandsjökull bráðni æ hraðar.  Stórir svelgir hafa myndast í jöklinum þar sem vatn virðist renna undir íshelluna og valda því að hún skríður hratt fram. Stórir ísjakar brotna og jökullinn kelfir út í hafið.

Hvaða máli skiptir það hvort að Grænlandsjökull bráðnar?   Það myndi kannski ekki skipta neinu máli nema vegna þess að mannkynið hefur á undanförnum öldum byggt borgir sínar og mannvirki án þess að taka nokkurt tillit til hugsanlegra breytinga í náttúrunni.  Stærstu borgir heims eins og Lundúnir og New York standa við sjávarsíðuna og eru algjörlega berskjaldaðar fyrir hækkun sjávarborðs.  En ef Grænlandsjökull bráðnar mun sjávarborð um allan heim hækka um sem nemur 7 metrum.

Það er því ljóst að tónlistarhúsið við höfnina í Reykjavík mun ekki standast bráðnun Grænlandsjökuls né miðbær Reykjavíkur yfirleitt.  Í staðinn fyrir að gera sér grein fyrir þessu og reyna að koma í veg fyrir bráðnun Grænlandsjökuls eru Íslendingar að byggja álver sem losa gróðurhúsalofttegundir sem líklega valda m.a. bráðnun Grænlandsíssins.  Það má því leiða að því nokkur rök að álverin á Íslandi muni að lokum sökkva miðbæ Reykjavíkur og færa Alþingishúsið á kaf.  Þá munu menn e.t.v. vakna upp við vondan draum í stjórnarráðinu og á Bessastöðum, ef ekki fyrr. 

Er Íraksstríðið fjármagnað með lánsfé?

Var ekki í fréttum nýverið að stríðið í Írak væri fjármagnað að stórum hluta með lánsfé?  Og það voru víst bara alls engin tengsl á milli Saddams og meintra hryðjuverkamanna.  Saddam var að vísu hinn mesti harðstjóri og hafði stundað morð og aftökur en svo má einnig segja um marga aðra harðstjóra í þessum heimi sem hafa fengið að starfa óáreittir.

Þetta vekur óneitanlega upp ýmsar spurningar. Í fyrsta lagi:  Er þjóðfélagsástandið í Bandaríkjunum með þeim hætti að þau þurfi að einbeita sér að utanaðkomandi óvini til þess að upplausnarástand myndist ekki innanlands?  Er nauðsynlegt fyrir Bandaríkin að eiga sér alltaf einhvern ytri óvin.

Þegar Sovétgrýlan var ekki lengur fyrir hendi, var þá ósk Bandaríkjamanna að fara í trúarbragðastríð við hinn islamska heim?  Var þetta það sem þeir vildu?

Er núna búið að búa til mynd af hinum islamska heimi sem óvinaheimi svipað og gert var við Rússland og Sovétríkin á sínum tíma?  Er ekki verið að blekkja okkur með því að velja ofan í okkur fréttirnar og matreiða okkur með ákveðnum upplýsingum?

Getum við yfirhöfuð treyst nokkru einasta orði sem Bandaríkjastjórn lætur falla um aðra menningarheima? Ég bara spyr?

Og ef það kemur heimskreppa, er það ekki beinlínis Bush-stjórninni að kenna?

Ég veit það ekki - ég bara spyr? 

Allt rólegt

Einn af þessum rólegu dögum.  Sólskin úti og krummi krunkar uppi á næsta ljósastaur.  Fór í Blómaval að kaupa páskablómin.  Sit og er að vinna í tölvunni.  Er að hugsa um að hafa lambalæri í páskamatinn.  Óska ykkur öllum alls hins besta.  Kær kveðja frá Selfossi.

Næturblogg

Nú er klukkan ekki orðin sjö að morgni og allir bloggvinir mínir eru INNI?  Eru allir farnir að blogga á næturnar eða er fólkið svona spennt að komast í tölvuna um leið og það vaknar?

 

Iðnaðarsvæðið Reykjanes - Achtung - Industrigebiet

Það er greinilegt að einhvers staðar í samfélaginu er pólitískur vilji til að breyta öllu Reykjanesinu í iðnaðarsvæði - eitt risastórt industrigebiet eins og maður keyrir lengi í gegnum áður en maður kemst inn í stórborgir erlendis.

Reykjanes virðist hér einkum gjalda þess að liggja svona nálægt Reykjavík sjálfri.  Reykvíkingar vilja ekki hafa þungaiðnað eða álver inni í borginni en einhverjum virðist það vera fyrirtaks hugmynd að hafa bara allt draslið á Reykjanesi í svona seilingarfjarlægð.  Þar með er Reykjanesið búið að missa sjálfstæði sitt og farið að þjóna Reykjavíkurborg sem iðnaðarsvæði fyrir þann iðnað sem íbúar stór-Reykjavíkursvæðisins vilja ekki sjá sjálfir en samt græða á.

Þetta væri kannski í lagi ef Reykjanes væri ljótur staður, en það er nú svo að á Reykjanesi eru margar óborganlegar náttúruperlur og afskaplega falleg ósnortin svæði sem töfrandi og gaman er að ferðast um.  Nefni sem dæmi Seltúnssvæðið (Krýsuvík), Brennisteinsfjöllin og Trölladyngjusvæðið svo eitthvað sé nefnt.  En nú á semsagt að slátra þessu öllu Reykvíkingum til hagsbóta.

Hvað segja Suðurnesjamenn sjálfir?  Líst þeim vel á að búa á miðju iðnaðarsvæði Reykjavíkurborgar og vera ruslakista fyrir þann iðnað sem Reykvíkingar vilja ekki sjá?  Sætta þeir sig við að búa í frumskógi af rafmagnslínum umkringdir girðingum þar sem stendur NO ENTRY! á ensku?

Maður bíður bara spenntur eftir því hvað gerist næst?  Verður kannski sett upp kjarnorkuendurvinnslustöð á Reykjanesi?   Er ekki hægt að flytja Sellafield til Reykjaness?

Orkuæði og flokksgæðingar

Það er greinilegt að það er sterkur þrýstihópur sem vill knýja í gegn álver í Helguvík.  Nú á að beita hnefarétti og valta yfir allt og alla.  Það liggur við að umhverfisráðherra sé sagt að skipta sér ekki af því sem henni kemur nú samt svo augljóslega við.  Hótanir liggja í loftinu!  Ef við fáum ekki að fara í Þjórsárvirkjanir þá verður ekkert netþjónabú!  Ef við fáum ekki álver í Helguvík þá förum við í fýlu. 

Það gleymist að flestir landeigendur við Þjórsá vilja ekki sjá Þjórsárvirkjanir.  Til hvers ættu Sunnlendingar yfirleitt að samþykkja að Þjórsá sé fórnað fyrir álver á Suðurnesjum.  Þetta er að vísu sama kjördæmið, en samt ekki alveg sama tóbakið, eða hvað? 

Er ekki kominn tími á eldgos á Reykjanesi?  Ætli Árni Sigfússon hafi sagt bandarískum fjárfestum frá því að þeir séu að byggja á virku eldfjallasvæði?  Kannski endar þetta alltsaman með því að það rennur hraun yfir álver og Reykjanesbæ eins og gerðist í Vestmannaeyjum.  En af hverju að taka tillit til náttúrunnar.  Hún hefur aldrei skipt neinu máli fyrir þá menn sem vilja álver í Helguvík þannig að af hverju ættu þeir að vara sig á þeim hættum sem náttúran felur í sér.  Það er nefnilega ekkert afl eins sterkt og máttugt á jörðinni eins og eldgos, ekki einu sinni Kauphöllin í New York og Dow Jones geta gert neitt ákveði jörðin að taka til sinna ráða.

 

Erich Fromm og normalitetið

Var að lesa á þýsku Die Pathologie Der Normalität eftir Erich Fromm.  Fromm kemst í raun að þeirri niðurstöðu að þeim sem líður vel í nútíma vestrænum þjóðfélögum, þeir sem blómstra í kerfi kapitalismans séu meira en lítið skrýtnir.  Allir hinir sem eru að verða vitlausir á kerfinu, hraðanum, verðbólgunni og brjálæðinu eru hins vegar afskaplega normal. 

Fromm útskýrir í löngu máli af hverju maðurinn var ekki hannaður fyrir nútímasamfélagið og hann útskýrir firringu mannsins í nútímanum.  Sjálfsagt einhver tengsl við Sartre en ég nennti ekki að kanna þau nánar.

Semsagt, ef þú ert að verða vitlaus á bankakerfinu, ástandinu almennt og heilbrigðiskerfinu þá er í lagi með þig, - ef þér finnst íslenskt samfélag hins vegar æðislegt og allt bara geggjað stuð, - þá skaltu leita þér hjálpar.