Myndarlegt í Vesturbænum

Í Reykjavík eru myndefnin óteljandi.  Það þarf bara að koma auga á þau.  Í gær gekk ég um Vesturbæ Reykjavíkur og þetta er m.a. árangurinn:

 

Alveg dottin í ljósmyndir

Fyrir 2 vikum gaf Valgeir mér Canon Powershot SX 100 myndavél og ég er búin að vera alveg heilluð af ljósmyndun síðan.  Svei mér þá ef þetta er ekki hið skemmtilegasta áhugamál.  Þetta verður kannski til þess að ég blogga minna, og tek meira af myndum í staðinn.

Gaman væri að taka seríu eins og álver á Íslandi,  fossar í útrýmingarhættu,  land sem fer undir vatn.

Reyndar eigum við myndir frá Töfrafossi og svæðinu í kringum Kringilsárrana.  Það er eins gott að taka myndir af landinu áður en það hverfur undir vatn. 

Ný ljósmyndasíða Ingellu

Kæru vinir og ættingjar,

Ég er komin með sérstaka ljósmyndasidu á slóðinni:  www.flickr.com/photos/ingella  .  Þið getið skoðað ljósmyndirnar mínar þar í framtíðinni.

Með kærri kveðju,

Ingibjörg Elsa Björnsdóttir 

Þriðja leiðin

Um daginn lést maður sem hét Alexander Solsjenitsyn.  Hann var andófsmaður og mjög gagnrýninn á sovét kommúnismann.  Það gleymist hins vegar, að hann var einnig mjög gagnrýninn á hinn óhefta kapítalisma og taldi m.a. aukið frelsi ekki hafa tilgang án markmiðs.  Til hvers að leyfa börnum aukið frelsi til að horfa á hryllingsmyndir, sagði hann.  Er frelsið alltaf jákvætt gildi í sjálfu sér?   Væri t.d. jákvætt að hafa meira "frelsi" í umferðinni.

Solsjenitsyn benti í skrifum sínum á þriðju leiðina - hann vísaði til skipulags heimsins sem einkenndist hvorki af sovét kommúnisma, né af óheftum kapítalisma í anda Dickens.  Kannski má kalla þessa þriðju leið hinn nýja heim.  Þessi þriðji heimur myndi vera vistvænn og sjálfbær.  Ekki yrði gengið nær höfuðstóli náttúrunnar en mögulegt er.  Hann yrði heimur samhjálpar, friðar og innri íhugunar.  Meiri áhersla yrði lögð á andleg og vitsmunaleg verðmæti, heldur en efnahagskerfi og ytra skipulag.  Stjórnmálamenn myndu hætta að hlusta á hagfræðinga og fara að hlusta á heimspekinga og trúarleiðtoga.  Þetta yrði hinn siðferðilega réttláti heimur (An ethically just world).

Það er allavega ljóst af gangi sögunnar, að sovét kommúnisminn er hruninn, kapítalisminn gengur ekki til lengdar vegna þess að hann grefur undan grundvelli siðmenningarinnar, þannig að mannkynið stendur nú frammi fyrir því tækifæri - já við skulum kalla það tækifæri, - að skapa hinn nýja heim.  Það er nú í höndum unga fólksins, að reyna að finna nýja og betri skipan mála, og slíkt verkefni er brýnt, vegna þess að segja má að eyðsla og sóun kapítalismans sé að ganga mjög nærri náttúrulegu umhverfi okkar.  Ekki er þó nóg að setja upp nýtt efnahagskerfi.  Það þarf nýja hugsun, ný innri viðhorf, og visku til að skapa hinn nýja heim.

Ferðast um Snæfellsnes

Var á Snæfellsnesi um helgina.  tók helling af myndum.  Eitt dæmi:

Dansað í kringum gullkálfinn

Á síðustu 200 árum hafa komið fram hinir nýju guðir mannlegrar rökhugsunar, tæknihyggju og auðsöfnunar.  Einnig hefur sjálfstæði þjóðríkja verið ýtt til hliðar með þeim rökum að markaðurinn einn og frjáls eigi að ráða.  Þessir nýju Guðir hafa komið í staðinn fyrir trúna á heilagan Skapara, og á heilagt innihald náttúrunnar og heimsins.  Þannig er í nútímanum ekkert lengur sem er heilagt.

Hefðbundin og söguleg tengsl á milli manns og náttúru hafa verið rofin og bóndinn er gerður að verkamanni á meðan kaupandinn er gerður að neytanda.  

Hið mikla magn mengunar og gróðurhúsalofttegunda sem er nú í andrúmslofti jarðar eru tengd þessari markaðsdýrkun, og auðsdýrkun.  Markaðshyggjan heldur því fram, að með því að safna auði í bönkum og með því að safna gulli eða pappírspeningum, sé hægt að undirbúa sig fyrir framtíðina.  Á sama tíma er gengið á hinn eina sanna höfuðstól, sem er höfuðstóll náttúrunnar, -regnskógum er eytt, eyðimerkur eru búnar til, andrúmsloft jarðar er eyðilagt.  Það stoðar manninn lítið að eiga gull í bankanum, ef andrúmsloftið er það mengað að það skaðar heilsu manna.

Heimsveldi markaðarins og stórfyrirtæki leitast í dag við að stjórna veröldinni.  Gallinn er bara sá að markaðurinn er blindur og stórfyrirtækin eru siðlaus.  Þess vegna munum við verða dæmd af náttúrunni og Guði í skilningi Gamla Testamentisins, með þeim dómi sem þó felur í sér endurlausn og möguleika á því að skapa betri og réttlátari heim.

En réttlátari heimur verður ekki að veruleika nema menn snúi af þessari braut markaðsveldisins, og komist aftur í samband við sjálfa sig, hið heilaga í veröldinni og náttúruna sem slíka. 

Bjarnarhafnarfjall í kvöldskini

Nokkrar myndir af Ströndum

Var á Ströndum um helgina.  Í alla staði stórkostleg upplifun.  Set inn nokkrar myndir til gamans.

 

 

 

 

Ákvörðun umhverfisráðherra mætir litlum skilningi

Ákvörðun umhverfisráðherra, Þórunnar Sveinbjarnardóttur, mætir litlum skilningi sveitarstjóra Norðurþings.  Það er ekki að furða.  Sveitarstjórinn og samherjar hans hafa ekki kynnt sér málin til fulls.  Ef þeir hefðu kynnt sér málin ofan í kjölinn, þá hefðu þeir e.t.v. dálítið meiri skilning á því af hverju ráðherra tekur þessa ákvörðun.

Þeir sem vilja álver á Bakka, vita fæstir nokkuð hvað loftslagsbreytingar eru.  Þær litlu upplýsingar sem þeir hafa um loftslagsbreytingar hafa þeir úr skýrslu Landlæknisembættisins frá árinu 2000, sem sagði að loftslagsbreytingar af mannavöldum yrðu æðislega góðar fyrir okkur Íslendinga.  Reyndar hafa fæstir Íslendingar minnstu hugmynd um það hvað loftslagsbreytingar fela í sér, og hafa þess vegna engar áhyggjur. ... ENNÞÁ.

En álver valda því miður hellings loftslagsbreytingum og þó að það séu til einstaka sérvitringar sem halda því fram að loftslagsbreytingar séu ekki að eiga sér stað (og meðal þeirra eru óvenju margir hérna á Moggablogginu), þá er allt vísindasamfélag heimsins SAMMÁLA UM að yfirgnæfandi líkur (meira en 90% líkur) séu á því að miklar loftslagsbreytingar séu að eiga sér stað AF MANNAVÖLDUM.

Skv. Loftslagsnefnd S.Þ. er ísinn á Grænlandi að bráðna með ógnvænlegum hraða.  Skriðjöklana kelfir í sjó fram og ísinn á Snæfellsjökli er að bráðna, hann er sprunginn og hættulegur yfirferðar.  Sífrerasvæði í fjallahéruðum, og í Ölpunum eru að bráðna og losa metangas og gróðurhúsalofttegundir þegar bráðnunin á sér stað.  Á sama tíma eru jöklar um alla veröld að hverfa.  Ísinn á Kilimanjaro er að hverfa, í Andesfjöllum hopa jöklarnir þannig að sama þróun er að eiga sér stað um allan heim.  Einungis á Austurhluta Suðurskautslandsins hefur orðið tímabundin aukning á ís, en það er sennilega vegna meiri úrkomu vegna loftslagsbreytinga, á meðan vesturhluti Suðurskautslandsins er að bráðna.

Ef Grænlandsjökull og Suðurskautslandið myndu bráðna að fullu, myndi sjávarstaða hækka um 64 metra. Af þessu má sjá að það þarf ekki nema það, að Grænlandsjökull og Suðurskautslandið bráðni AÐ HLUTA, til þess að sjávarstaða hækki um svosem 10 - 15 metra yfir núverandi sjávarmál.  Þetta er sú mikla áhætta sem er fólgin í losun gróðurhúsalofttegunda - þetta er sú áhætta sem við erum að taka.  Spár Loftslagsnefndar S.Þ. um að sjávarstaða hækki um mest 59 cm á þessari öld, gera ekki ráð fyrir neinni bráðnun á Suðurskautslandinu og reiknað er með afskaplega lítilli bráðnun Grænlandsjökuls.  Það eru því margir vísindamenn sem gagnrýna Loftslagsnefndina fyrir að vera ofurvarkára í spám sínum.  En nóg er að sjávarstaða hækki um 1-3 metra til þess að vandamál skapist víða um heim og einnig hér á Íslandi.

Álver valda því beinlínis að jöklarnir bráðna, það eru álver sem eru að valda því að Grænlandsjökull er að bráðna.  Mikið yrði ég fegin ef einhver næði að skilja þetta einfalda samhengi hlutanna. Álver losa hundruðir þúsunda tonna af gróðurhúsalofttegundum út í andrúmsloftið á ári hverju. SEMSAGT Húsvíkingar geta alveg fengið sér álver, en þá er líka mjög líklegt að HÚSAVÍK muni þá fara í kaf síðar á þessari öld eða á þeirri næstu.  Húsvíkingar á fimmtugsaldri munu þannig geta notið ávaxta álversins, en börnin þeirra og barnabörnin munu þurfa að yfirgefa svæðið þegar sjávarstaða nær þeim hæðum að ekki verður lengur búandi í bænum.  Ef ekki tekst að stöðva bráðnun Grænlandsjökuls og ef meðalhiti jarðar hækkar um sem nemur 4 gráðum á Celsius gæti þessi fáránlega hugmynd orðið að raunveruleika.

Þeim sem ekki trúa þessu er bent á að lesa skýrslu Loftslagsnefndar Sameinuðu Þjóðanna frá 2007. Sjá www.ipcc.org.  Og það er ekki nóg að lesa bara samantektina.

Að auki munu loftslagsbreytingar leiða til þess að matvæla- og olíuverð mun hækka enn frekar, þannig að efnahagsáhrifin munu verða ógnvænleg.  Þetta kom fram í Stern skýrslunni svokölluðu.  Þannig að mér er svosem sama þótt að Húsvíkingar fái sitt álver, en það er samt sorglegt vegna þess að slíkt álver mun stuðla að því að koma Húsavík undir sjávarmál ef svo fer að ekki takist að stöðva bráðnun Grænlandsjökuls. 

 

Prinsessan Alexandra af kattarkyni

Á heimili okkar býr yndisleg prinsessa sem hefur gaman af því að sofa út í glugga, og borða gras í garðinum.  Það er kisan okkar hún Alexandra vum Daerchen.  Alexandra er hreinræktaður BIRMAN köttur, og er dóttir hans Vampy.  Eins og þið sjáið á myndinni er hún Alexandra afar sjarmerandi og bræðir öll þau hjörtu sem koma í heimsókn (auk þess sem hún er náttúrulega löngu búin að bræða okkar hjörtu).

Mæli einnig með því að fólk googli orðið birman á netinu til að fá nánari upplýsingar um þessa stórkostlegu ketti.