Þyrlað upp moldviðri

Nú er svo komið að sumsstaðar á Íslandi er ekki lengur hægt að pissa á bakvið stein án þess að eiga það á hættu að þyrla með auðmenn fljúgi yfir og grípi mann glóðvolgan.  Auðmenn fara nú um sveitir og almenninga á þyrlum og fara mikinn. 

Um daginn var ég stödd við Gullfoss ásamt hundruðum ferðafólks.  Veðrið var gott og regnbogi var yfir fossinum...EN... það sveimaði risastór þyrla eins og vofandi fiskifluga yfir fossinum og olli þvílíkri hávaðamengun að margir tóku fyrir eyrun.

Þetta var sjálfsagt auðmaður að skoða fossinn,  og að sjálfsögðu gat hann ekki umgengist pöpulinn á jörðu niðri heldur varð að virða herlegheitin fyrir sér úr lofti.  

Á Þingvöllum nota menn þyrlur til þess að komast í og úr sumarhúsum með tilheyrandi látum og yfirgangi.

Og Yfirgangur - er það ekki rétta orðið yfir þetta hátterni.  Hinir nýríku auðmenn Íslands eru að sýna öllum öðrum beina fyrirlitningu með því að segja - sko ég á helling af pening en þið eigið ekkert.  Þetta er hlálegt í ljósi þess að margir þessara auðmanna hafa efnast vegna sölu ríkiseigna sem þeir fengu næstum því gefins í einkavinavæðingu Davíðs og Halldórs. 

Athugasemdir

[Júlíus Valsson, 10.7.2008 kl. 22:23]

Þyrlur koma og fara. Peningarnir fjúka. Það gustar um Fjallkonuna. Hún þarf að halda í pilsfaldinn.

[Auður (IP-tala skráð) 10.7.2008 kl. 23:20]

Er þetta ekki bara sorglegt..