Yndislegt að búa á Selfossi

Þrátt fyrir skjálftahrinur finnst mér hvergi eins yndislegt að búa og á Selfossi.  Hér er gott mannlíf, gott fólk, næg þjónusta, frábær heilsugæsla, íþróttaaðstaða, tónlistarskóli, frábært tónlistarlíf og svo má lengi telja.  Mér finnst í raun og veru að ég eigi varla að segja frá því hvað er gott að búa hérna til þess að Selfoss verði ekki eins og Reykjavík.  En á því er nú kannski ekki mikil hætta.

Ég er samt Reykvíkingur sjálf, og þekki Reykjavík eins og lófan á mér.  En mikið er umferðin orðin leiðinleg í höfuðborginni, og mikið getur fólk verið ókurteist og ruddalegt niðri í miðbæ Reykjavíkur á laugardagskvöldum.   Nei ég fíla ekki Reykjavík og mér finnst allt í lagi að vera í Reykjavík í 2-3 daga samfleytt en ekki lengur.  

Það eina sem ég sakna frá Reykjavík er kannski Þjóðarbókhlaðan og Háskólasvæðið eins og það leggur sig.  En vonandi verður sett upp háskólasetur á Suðurlandi og jafnvel Suðurlandsakademía í tengslum við Reykjavíkurakademíuna.  Slíkt gæti eflt mjög allt akademískt starf hér á Suðurlandi. 

Athugasemdir

[Ingibjörg Álfrós Björnsdóttir, 4.7.2008 kl. 05:44]

Sæl Ester,

Það eru mjög góðir læknar hérna á Selfossi.  Og það er sjúkrahús hérna líka, sem að sjálfsögðu má alltaf styrkja og efla enn meir.  Síðan er ekki nema 45 mínútna akstur til Reykjavíkur ef eitthvað kemur upp á sem þarf að skoða í Reykjavík.  Þannig að við búum við meira öryggi en víða annarsstaðar "á landsbyggðinni".  Heilsugæsluna má þó alltaf efla, enda fjölgar íbúum í Árborg stöðugt.