Ég fer í fríið!

Eftir að hafa upplifað jarðarför, jarðskjálfta og ísbjörn er ég búin að ákveða að fara í viku frí.  Ég verð í bústað við Hreðavatn og það verður ekki hægt að ná í mig nema í gegnum farsíma.

Gönguskórnir verða teknir með, svo og sólarvörn og veiðistöng.  Tilvalið að ganga niður að Glanna, skjótast í Paradís og jafnvel labba upp á fjall. Aldrei að vita nema maður rekist á 7 milljón ára gamla steingervinga af trjálaufblöðum og elftingum sem uxu í mun hlýrra loftslagi en nú er.  Ekki það að ég ætla ekki að leita að steingervingum sérstaklega.  Steingervingar eru friðaðir og eiga að vera kyrrir í náttúrunni þar sem þeir eru.  En ágætt er að láta steingervingafræðinga vita af fundarstað, ef maður rekst á eitthvað forvitnilegt.

Hallarmúli er gömul megineldstöð sem var virk fyrir þetta 6 milljónum ára.  Ýmis græn litbrigði í fjallinu eru merki um fornan jarðhita og eldvirkni.  Hafnarfjall var virk eldstöð á svipuðum tíma.  Síðan er náttúrulega hægt að skokka upp á Grábrók og virða fyrir sér útsýnið.  Hempuklettur við Laxfoss er örugglega á sínum stað.  Ég heilsa honum alltaf eins og gömlum kunningja þegar ég fer uppeftir.

Já, ég fíla Borgarfjörðinn, - sérstaklega Norðurárdalinn. 

 

Athugasemdir

[Guðjón Sigþór Jensson, 15.6.2008 kl. 20:43]

Já Borgarfjörðurinn er alltaf góður. Er sjálfur að hugsa um að skreppa í Skorradal síðdegis á morgun og vera þar nokkra daga. Kannski ef verður hægviðri verður unnt að setja árabátinn á flot og róa um Skorradalsvatnið sem er ekki ósvipað og Hreðavatnið nema þar er ekki eins mikil traffík.

Mosi 

[Guðjón Sigþór Jensson, 15.6.2008 kl. 20:49]

Á Skorradalsvatni er því miður allt of mikið af þessum hraðbátum sem væntanlega ekki eru á Hreðavatni. Það er hreint skelfilegt t.d. við fuglaskoðun þegar þessir hraðbátakarlar vakna og eru komnir á rólið um hádegisbilið, þá breytist Vatnið úr friðsælli paradís í hávaðahelvíti á nokkrum mínútum.

Óska þér góðrar og friðsællar dvala við Hreðavatn.

Mosi