Iðnaðarsvæðið Reykjanes - Achtung - Industrigebiet

Það er greinilegt að einhvers staðar í samfélaginu er pólitískur vilji til að breyta öllu Reykjanesinu í iðnaðarsvæði - eitt risastórt industrigebiet eins og maður keyrir lengi í gegnum áður en maður kemst inn í stórborgir erlendis.

Reykjanes virðist hér einkum gjalda þess að liggja svona nálægt Reykjavík sjálfri.  Reykvíkingar vilja ekki hafa þungaiðnað eða álver inni í borginni en einhverjum virðist það vera fyrirtaks hugmynd að hafa bara allt draslið á Reykjanesi í svona seilingarfjarlægð.  Þar með er Reykjanesið búið að missa sjálfstæði sitt og farið að þjóna Reykjavíkurborg sem iðnaðarsvæði fyrir þann iðnað sem íbúar stór-Reykjavíkursvæðisins vilja ekki sjá sjálfir en samt græða á.

Þetta væri kannski í lagi ef Reykjanes væri ljótur staður, en það er nú svo að á Reykjanesi eru margar óborganlegar náttúruperlur og afskaplega falleg ósnortin svæði sem töfrandi og gaman er að ferðast um.  Nefni sem dæmi Seltúnssvæðið (Krýsuvík), Brennisteinsfjöllin og Trölladyngjusvæðið svo eitthvað sé nefnt.  En nú á semsagt að slátra þessu öllu Reykvíkingum til hagsbóta.

Hvað segja Suðurnesjamenn sjálfir?  Líst þeim vel á að búa á miðju iðnaðarsvæði Reykjavíkurborgar og vera ruslakista fyrir þann iðnað sem Reykvíkingar vilja ekki sjá?  Sætta þeir sig við að búa í frumskógi af rafmagnslínum umkringdir girðingum þar sem stendur NO ENTRY! á ensku?

Maður bíður bara spenntur eftir því hvað gerist næst?  Verður kannski sett upp kjarnorkuendurvinnslustöð á Reykjanesi?   Er ekki hægt að flytja Sellafield til Reykjaness?

Athugasemdir

[Emil Hannes Valgeirsson, 13.3.2008 kl. 09:48]

Það virðast allt of margir vera haldnir algerri staurblindu á verðmæti náttúrunnar eins og hún kemur fyrir ósnortin. Og jú, sennilega þættu Suðurnesjamönnum alveg ágætt að fá kjarnorkuendurvinnslustöð á sitt svæði ef það skapar pening. Vestfirðingar væru að sama skapi kannski til í að leysa sorpvandamál Napólíbúa, ef það skapar atvinnu.

[Ásgeir Kristinn Lárusson, 13.3.2008 kl. 14:16]

Kannski er orðið yfir þetta sindróm - sjálfseyðingarhvöt - .  Guðbergur Bergsson lýsir þessu vel í mörgum bóka sinna, enda fæddur og uppalinn í Grindavík.  Vandamálið liggur líka í þekkingarskorti og algjöru andvararleysi gagnvart náttúru og sögu landsins.

[Steingerður Steinarsdóttir, 13.3.2008 kl. 15:46]

Ég hef aldrei getað skilið þennan gífurlega iðnaðaráhuga. Það er ekkert aðlaðandi við iðnaðarver og störf sem bjóðast þar eru oftast óþrifaleg, erfið og andlaus.