Að fá álver í nefið á sér!

Hafnfirðingar standa núna frammi fyrir þeim raunveruleika að þeir eru að fá álver í nefið á sér. Allir vilja fá álver á Indlandi eða álver í Ástralíu en álver með tengivirki beint fyrir framan svalahandriðið er einfaldlega aðeins of mikið fyrir suma. Hvernig á maður t.d. að grilla sunnudagssteikina þegar álversgirðingin er í nokkurra sentimetra fjarlægð frá svölunum. Á maður að bjóða fjölskyldunni upp á lærisneiðar með flúorbragði eða brennisteinssalti og krydda síðan með krabbameinsvaldandi PAH efnum. Örugglega mjög hollt, sérstaklega ef maður grillar hangikjöt og fær það reykt í þokkabót.
Furðulegasta fólk virðist vera að umhverfast yfir í róttæka umhverfissinna. Þegar það uppgötvar álver í bakgarðinum umhverfist það á einu andartaki úr bláum sjálfstæðismönnum í rauðgræna vinstri græna. Og íbúðirnar falla í verði. Baráttan um Reykjanesið stendur NÚNA. Annað hvort björgum við Reykjanesinu eða þá að Reykjanesið verður eitt allsherjar risastórt INDUSTRIGEBIET eða iðnaðarsvæði sem við keyrum í gegnum á leiðinni til Reykjavíkur.
Á endanum munu íbúðir á öllu Reykjanesinu falla í verði vegna þess að hver vill búa við hliðina á rafmagnslínu, tengivirki, jarðvarmavirkjun eða vera með eitt stærsta álver Evrópu í bakgarðinum.
Ég hef svosem ekkert á móti áliðnaðinum sem slíkum, bara ef hann myndi endurvinna allt álið sem hann framleiðir, (þá þyrftum við ekki allar þessar álverksmiðjur) en ég skil það fólk sem er svekkt og pirrað yfir því að þurfa að borða lærisneiðar með flúorbragði. Er ekki betra að bursta tennurnar og setja áldósirnar í endurvinnslu ?

Athugasemdir

[Sigurður Egill Þorvaldsson, 21.3.2007 kl. 23:13]

Sæl Ingibjörg

 Hér er dregin upp frekar dökk mynd af íbúa byggð við álver.  Vill samt benda þér á að flúor og brennisteinn mælist um 1% af heilsuverndarmörkum við byggðina sem er næst álverinu.  Hæstu gildi sem mælast er þegar vindur stendur frá Hafnarfjarðarbænum sjálfum.

Varðandi lækkun á fasteignaverði, þá er mjög undarlegt að aldrei hefur verið meiri sala á fasteignum á Völlunum næstu íbúðabyggð álversins.  Fer fólk að kaupa sér fasteignir rétt fyrir kosningar ef það telur að hún lækki strax í verði??

Flott saga samt  :-) 

[Ingibjörg Álfrós Björnsdóttir, 22.3.2007 kl. 00:21]

Sæll Sigurður,

Það er auðvelt að hagræða mengunarlíkönum eftir óskum verkkaupa og mér er sama hvort það er 1% einn daginn eða 10% hinn daginn - mengunarefnin eru þarna samt sem áður. Verður kannski notuð BAT tækni til þess að mæla mengunina, t.d. DOAS ?