Um kærleika Guðs.

Ég hef ákveðið að leggjast í nokkrar guðfræðilegar pælingar á blogginu mínu.  Fyrst og fremst er um að ræða kristna guðfræði þar sem það er sú guðfræði sem ég þekki best.  Í dag er umfjöllunarefnið:  Kærleikur Guðs.  Samkvæmt kristnum skilningi er það grundvallaratriði að svo elskaði Guð heiminn að hann gaf son sinn eingetinn til þess að hver sem á hann trúir geti öðlast eilíft líf.  Það er mikilvægast í þessu sambandi að Guð elskar manninn strax frá upphafi veraldarinnar, áður en að maðurinn jafnvel veit að Guð er til.  Þannig er enginn maður laus við Guð vegna þess að Guð er hjá manninum jafnvel þótt að maðurinn sé ekki hjá Guði.  Þetta er grundvallaratriði.  Þú sem manneskja hefur frelsi til að yfirgefa Guð en samkvæmt kristnum skilningi yfirgefur Guð þig aldrei.  Þú sem manneskja ert ekki ofurseldur ómanneskjulegum og grimmum náttúruöflum heldur hvílir þú í kærleiksríkri hendi Guðs hvort sem þú viðurkennir það eður ei.  Kærleikur Guðs er einnig opinn kærleikur að því leyti að maðurinn sem er orðinn viðskila við Guð getur alltaf snúið til baka til þess samfélags og kærleika sem Guð býður honum.  Þú getur gefist upp á Guði en þú getur verið viss um að Guð hefur ekki gefist upp á þér.  Að sama skapi er enginn maður laus við trú.  Eins og guðfræðingurinn Paul Tillich bendir á, þá trúum við öll á eitthvað.  Við myndum ekki ganga yfir götu ef við tryðum því ekki að gatan væri örugg.  Við myndum ekki setjast upp í flugvél nema vegna þess að við trúum og treystum því að flugmaðurinn kunni að fljúga.  Þess vegna verðum við að gera okkur grein fyrir því hverju við trúum.  Hver er okkar raunverulegi átrúnaður?  Enginn maður getur lifað án þess að trúa á eitthvað.  Vitum við almennt á hvað við trúum ?

Athugasemdir

[Vilborg Eggertsdóttir, 20.3.2007 kl. 12:28]

Minn skilningur er sá að við erum "Guð" þ.e. Faðir/Móðir/Andi að endurskapa sjálft sig í gegnum reynslu okkar. Frjáls vilji er frjáls vilji. Gerðum tilveru þessa afstæða til að skilgreina okkur, gætum ekki þekkt hið góða án andstæðu sinnar. Allt er af ljósi mínu, menn, dýr, gróður,jörð aðrar víddir, allt er samofið og hefur áhrif hvort á annað. - Ég er ALLT sem ER -, ég er handan hugans, ég er rödd hjartans.