Hvað skiptir manninn máli!

Öll þurfum við að uppfylla okkar grunnþarfir um fæði og klæði.  En þarfir mannsins eru ekki þar með upp taldar.  Maðurinn hefur ýmsar félagslegar, vitsmunalegar og trúarlegar þarfir sem skipta hann ekki síður máli en daglegt brauð.  Öll þurfum við trú,von og kærleika og af þessu þrennu er kærleikurinn mestur.  Við þurfum einnig að upplifa samfélag við aðra menn,  samfélag við Guð og við náttúruna og lífríkið í kringum okkur.  Við erum hluti af þeirri stórkostlegu heild sem lífið er.  En er ekki kominn tími til þess að við spyrjum okkur sjálf hvað í veröldinni skiptir okkur mestu máli (What is our ultimate concern!).  Eru það efnislegu gæðin, dauðu hlutirnir, bílarnir, húsið, málverkin, bækurnar.  Dauðu hlutirnir geta ekki huggað okkur ef við veikjumst af krabbameini eða Alzheimer.  Dauðu hlutirnir geta ekki fært okkur til baka þá sem við elskum en höfum misst.  Þessvegna þurfum við að leita á vit hins trúarlega til þess að finna svör, til þess að svala lífsþorstanum sem hvergi annarsstaðar fær næringu.  Enda er það sláandi að á þessum efnahagslegu velmegunartímum sækir fólk sem aldrei fyrr í kirkjur og á fyrirlestra þar sem boðið er upp á andlega næringu.  Leitið og þér munuð finna.  Knýjið á og fyrir yður mun upplokið verða. 

Athugasemdir

[Sigurður Þór Guðjónsson, 17.3.2007 kl. 23:57]

Hvað Alzheimer varðar skiptir trúin eða annað engu máli. Menn gleyma bara guði eins og hinu þegar nógu langt er komið í sjúkdóminn. Þess vegna er Alzheimer svona knýjandi spursmál um það hvað maðurinn í rauninni er. En hvað með kynferðislegar þarfir? Eru þær ekki meðal þessara frumþarfa?